2014 Seoul 6D5N Schedule ● 韓國首爾櫻花自由行 《行程、酒店、交通、兌換、WIFI BB》


2014 Seoul 6D5N Schedule ● 韓國首爾櫻花自由行 《行程、酒店、交通、兌換、WIFI BB》
3-8 APR, 2014

終於返左香港喇 ! 一行四人去左首爾六日, 好符碌地撞正櫻花於首爾盛開之時, 原來首爾仲係好凍, 係真係寒個種 ! 去哂大部份我想去既地方, 唯獨係好冷靜無安排自己行樂天OUTLET, 又無行樂天商場睇LC, 大家都討論緊既花花煲, 我都係好奇下之後就算 ! 煲真係夠用, 係個廚房唔夠用 ! 哈哈哈哈 ! 


講返首爾先, 一去去左六日, 係第四日大家都開始掛住香港 , 一來掛住黃BIBI, 二來我地已經安排食飯都食得唔錯, 但都仲係覺得無咩好食, 好普通, 無驚喜 ! 

講SHOPPING - 我拖住老公同黃爸爸呢PART組合, 我都唔好意思行街買衫, 如果同女仔朋友去我相信我會瘋狂間間SHOP掃 ! 衫- 好想買衫架, 不過價錢都幾高, 普通一條裙/衫都要HK280以上, 可能我唔識行去掃平貨~ 最抵買都係梨花女大, 好難得買到兩條裙, 加埋HK200, 超值呀 ! 化妝品/護膚品- 基本上全智賢既代言我都買左, 哈哈哈 ! 當然係試過先買啦 ! 真係好好用~ 遲下再介紹 !面膜掃左好多, 主玫都係唇膏 ! 哈哈

韓國人方面呢, 真係落機到酒店係早上八點, 呆下呆下去坐地鐵去明洞兌換錢, 地鐵係爆多人返工時間 , 我地酒店附近又好多OFFICE, 真係係地鐵上歡迎推撞 ! 嚇到唔敢坐地鐵 ! 哈哈哈 ! 重點係我地係酒店行去明洞唔使十分鍾, 哈哈哈 ! 豬到呢~~~ 算啦 ! 第一日咩都唔識架啦 ! 韓國我真係覺得男人係好過女人好多, 男人真係會願意幫你/好熱情, 女人(不論係年青/阿朱媽)都係好粗魯, 無咩禮貌 ! 只有餐廳既阿朱媽會好少少~ 

天氣 - 比較乾架 ! 真係唔該要日日FU面膜呀 ! 不過乾得黎好爽呀 ! 返到香港感覺做緊steam咁~ 又濕又焗~ 唉~ 天氣真係韓國正d~ 哈哈~

食 - 來來去去都係泡菜, 燒肉, 鐵板燒, 辣炒雞, 人參雞, 海鮮 ! 我食到生口瘡, 好似三粒大+兩粒細菲滋一齊開party~哇 ! 痛到呢加 ! 真係好慘~ 

好啦 ! 時間關係遲下先放多D相~ 呢張日日都有D~




最重點係我出發前兩日先搵行程, 仲要最後整左本行程表出黎, 有成21頁, 因為我有好多地圖~ 唔使驚行錯路 ! 好方便 ! 去旅行做足準備 ! 



行程最後都有改動 ! 大部份都跟得上 ! 

我去自由行最喜歡跟台灣BLOGGER既行程, 因為都寫得好詳細, 基本上照跟都一定去到 ! 同埋有兩個網站一定要跟係部電話 ! 一個係韓巢, 另一個係韓巢地圖, 坐的士俾司機睇有埋韓文字, 地圖都係中文方便自己搵路呀 ! 我本行程天書都係係韓巢搵料架咋 !

韓巢  : http://cn.konest.com/
韓巢地圖 : http://map.cn.konest.com/

行程:

3/4/2014 (Thur) Day 1

 ( 明洞/龍山/明洞 ) 
落機 → 坐巴士6701 → 酒店放行李 → 明洞兌換 → IASSA土司早餐 → 龍山汗蒸幕→ HOTEL → 품앗이Pumasi → 南山塔 → 新村餐館烤肉 

4/4/2014 (Fri) Day 2 

( 東大門/鍾路5街/惠化/明洞/首爾 ) 
陳玉華一隻雞 → 廣藏市場 → 中部市場 → HOTEL  → 駱山公園/壁畫村→ 柳氏家辣炒雞排 → 樂天超市 

5/4/2014 (Sat) Day 3

( 忠武路/鷺梁津/永登浦/市廳/明洞 ) 
南山谷韓屋村 → 鷺梁津水產市場 → 永登浦地下街 → Hotel → 全州中央會館(拌飯) → 夜遊明洞 

6/4/2014 (Sun) Day 4

( 鍾路5街/梅峰/明洞 ) 
(世宗村飲食文化街) 牛肉湯 → 景福宮 → 光化門廣場 → 綠茶專門店 o'sulloc TEA HOUSE → 明洞小食 → 韩国馆 (한국관) 

7/4/2014 (Mon) Day 5 

(景福宮/梨花女大/龍山//弘大入口/市廳 ) 
土俗村參雞湯 → 梨花女子大學 →龍山汗蒸幕 → 橋村炸雞(弘大店) → 帆布餐館 

8/4/2014 (Tue) Day 6 

( 首爾/明洞 ) 
樂天超市 →  全州中央會館(拌飯)→  明洞聖堂 → LONGBREAD → 3:15pm回酒店pickup → 3:45pm上車


酒店

Hotel Aropa 阿魯巴酒店
地址:  17-2 Bukchang-dong, Jung-gu, 明洞, 首爾, 韓國
Tel: +82263626000 
地鐵 : 市廳站7號出口 *1號線 (132) / 2號線 (201)* 
機場巴士 : 6701 , 第二站廣場酒店(The Plaza Hotel) 落車, 
行過對面馬路再直行再過馬路, 向前行3分鍾就到


原來我無影酒店外貌相, 全部都係上網搵既~ 個樣咁係咁架喇 ! 


係機場巴士落車行去都幾方便 !  

T-money卡

係仁川機場出閘後第一時間去GS25買T-money卡先, 因為要上機場巴士用, 如唔買住就係6701巴士櫃位買車票先, 16000won/person, T-Money卡用於地鐵/的士都得, 非常方便 ! 我記得好似要先買卡, 後再入錢, 買卡價錢就唔記得喇 ! 好平架咋~


機場有兩間GS25, 我地係最頭個間先買到T-money卡


行返去機場4B出口, 會有去市廳方向既機場巴士, 我坐呢間6701就係呢邊, 坐咩巴士要睇返, 係唔同出口都有唔同巴士 !

記得睇定回程車時間, 好準時架 !





走既時候都係同落車個陣一樣, 係廣場酒店門口等, 呢間廣場酒店係五星級, 非常好服務呀 !

巴士非常闊落, 仲幾好坐 ! 司機幫你拎哂行李, 好nice~

去個程用T-money card, 回程係上車收現金

地鐵 
基本上都好方便, 不過要睜大對眼睇清楚咩站去咩站, 初初覺得有D亂,特別係1號線~ 好舊~ 發現車程長/短都係1050won起計, 睇你去到邊再收多你幾多won~  

的士
 發現原來有兩種, 一種係黑色, 模範的士, 精通其他語言, 不過就5000won起錶, 車身大架少少, 我地就坐過一次, 其他大部分都係坐橙/灰的士, 不過要小心有機會司機唔識路 ! 你要去韓巢CHECK定個韓文名, 唔好信google translate, 害死人~ 哈哈哈 !


橙/灰的士 - 3000won起跳, 韓國的士唔擔心會繞路, 因為有自動導航, 司機會入地址帶你去到目的地, 又或者打電話去個間鋪問地址 , 所以一般近近地我地都係坐的士 !


兌換
係香港換定左韓won, 去到明洞再兌換多D~ 好似係 HK1:WON135 左右, 好多人都介紹大使館, 最好大家行前行後睇多一兩間, 後面個間有時會高少少


明洞5號出口一出, 直行經過見到ISAAC烤土司店請轉右, 直行兩個街口就到 !一品香/大使館都係同一條街, 大家差唔多價 !




WIFI BB
網站 : http://www.wifibb.com/

去韓國一定要WIFI蛋係身, 不過好多朋友都係韓國先搞, 我地怕麻煩, 係香港拎定先, 有朋友用過WIFI BB接收隱定, 價錢$90/DAY, 不過去6日就計5日錢, 我地去6日都係收$450, 可以同時間提供俾五部電子儀器使用 ! 如果多部機一齊用, 電都會用得好快, 我地真係用齊五部, 老公去旅行都做緊野, 不停都係上網, 所以用電好快, 最緊要記得帶隨身差電器 ! 非常重要 ! 我地隨身差電器都帶兩部 ! 哈哈哈 ! 真係好誇張 !


WIFI BB暫時只提供日本/韓國服務, 有齊差電線、插頭


細細部都幾方便 ! 推介 ! 不過係拎機唔太方便 !

 拎機地點係 : 香港國際機場 翔天路1號 機場世貿中心1樓107室
前往方法就係:平時落機往機場巴士方向行,有條橙色通道, 行入去會見到 「行李寄存」,面向「行李寄存」既左邊有度門, 行入去係後樓梯咁款, 請再向前行推開度門, 會見到好似停車場既地方, 向前行會見到磨沙玻璃門, 就係機場世貿中心, 上到1樓, 門口既左邊請按鐘, 就有人開門俾你 ! 就係咁~ 因為我發現佢教既路線好複雜, 如果明明就係機場巴士個條橙色通道, 唔使又T2又第三層 ! 真係呢~~ 明明好簡單 ! 搞到我行左一轉~~ 所以就係咁簡單就拎到機喇 !

留言

張貼留言